Topins de Lenga passats

Topin de la Batalha d'Ortès

Semboès lo 19 de noveme 2023

La Topin de la Pena de Mur

Castanheda lo 24 de seteme 2023

Ua rondalejada de las beròjas miada peu Cristau dab un bèthvéder tot au briu de la marcha que'ns permeten de repassar las montanhas deus Pirenèus, de descrobir d'un biais diferent vilatges, castèths, paisatges...

Mes en tèrmi de bèthvéder çò de mièlher qu'ei per arribar... Un camin boscassèr qui bordeja l'ancian casterar roman que'ns mia a la pena qui senhoreja de 144 mètres sus la plana.

Pausa au ras de l'estatua de la Verge. Au cap de 2 òras de passejada que se'n va temps de partatjar lo disnar. Que van seguir un cluc tà quauques uns... E cantas tà tots. Ua presentacion de la legenda de la Pena - los Mòros que i aurèn trobat un acès... - e drin d'istòria – lo bailatge hantaume de Mur - per l'Estève. E Lavetz Cristau que'ns harà descobrir e mei que mei léger lo perqué qu'aquera estatua au bec – pr'amor deu curat de Castanheda... Ua tempsada hèra agradiva tota en lenga, un còp mei.

Topin de Salias peus Salièrs

Salias lo 30/07/2023

Que son visitas perpausadas per l'associacion deus comerçants (l'ACAS) tà har descobrir la vila dab estancs gormands en comèrcis volontaris.

Drin de cambiament aqueth dimenge dab ua visita en occitan qui mesclè monde de tota traca. Qui i èran los acostumats deu Topin com personas gessidas d'autes parçans briga assabentadas de la lenga nosta mes curiosas de'n saber mei. E la saussa que gahè mercés au Salièr deu dia, lo Joan Francés Tisnèr qui'ns passegè per las arruas de la vila. Que sabó hèra plan hà'ns descobrir la soa vila en tot mesclar soviers deu temps de joenèr dab l'istoèra deu lòc. E saussa que n'i avó tanben mes de la qui hasó la fortuna deus part-prenents. E coleder, dulin, eca... Un gran mercés ad eth.

D’estanc gormand que n’i avó un bèth au «Moment Librairie», la libreria independenta de tria de Salias. De vertat non podèvan pas càber en los comèrcis, las 25 personas qui partatgèn aquera tempsada dinamica. Que ns’arcuelhó lavetz la libreria tà l'aperitiu dab las boniquerias auheridas peus comèrces participants. Au davant lo Joan Miquèu Dordeins que'ns hasó lo gran plaser d'animar un sesilha de descoberta deu son roman policièr, «Murtres en cadena» a las edicions Reclams. E tot com pendent la visita, l'ajuda deus locutors emmesclats que permetó a tots de seguir com cau e de passar ua tempsada plea d’escambis. Un gran mercés ad eth tanben. Los darrèrs mercejaments : tau «Moment Librairie» peu son arcuelh e a Mauryne per aver gausat aquera visita en lenga nosta !

Tà caperar aquera tempsada agradiva l'aubèrja bearnesa, solide, que i avó lo disnar partatjat.

Topin de las orquideas

Sauvatèrra lo 14 de mai 2023

1 clatre triscat,

2-3 èrba abelha,

4 serapià lenga,

5 èrba mosca,

6 serapià deu labèlle long,

7-8 anacamptis piramidau,

9 èrba abelha,

10 esplinguetas (gerànium èrba de Robèrt),

11 tamós comun o reponchon.

Topin deus mossarons

Sauvatèrra lo 19 de març 2023

Quin beròi dia aqueste dimenge de descoberta deu monde deus mossarons !

Tot que comencè per ua passejada suu cantèr deu gave d'Auloron a Sauvatèrra. E se n'i èran pas los mossarons que i èran totun los explics generós deu Cristau de Hauguernes, l'organizator deu dia. Que s'ensenhè lo biotòp d'aqueth camparòu, las correlacions e los simbiòsis... autant d'endics tà ua cerca a viéner ! Que s'ensenhè mantuas plantas e flors qui i èran eras : Creishoneta, esquila primavèra, liri jacint, ahumada etc... Lo campèstre en rauba pingorlada que'ns ditz lo primtemps qu'ei arribat e l'ivèrn en descampa...

E com de costuma que contunhèm per ua tempsada conviviau : l'aubèrja bearnesa, lo disnar partatjat tirat de la saca. Batalèra, cantas dab la nautat deu dia : la creacion deu Cristau : «los Mossarons», cantat sus l'aire de «Los tilholèrs». Òsca au creator !

E au vrespe la conferéncia-debatuda sus aqueth camparòu mitic e lo monde deus camparòus en generau. E que sabó trobar lo noste conferencièr l'equilibri just en apregondir las nostas coneishenças shens perdé'ns. Que mesclè explics scientifics sus coneishenças popularas (aròus de broisha etc.) dab la lectura de tèxts d'Albert Peyroutet e deu Ramonet deu pè de la vit.

Ua prestacion de hauta volada, un gran mercés a Cristau per aqueth beròi dia.

Taus qui volerén anar mei luenh, Le Blog de Cristau de Hauguernes qui'ns hè partatjar la suas coneishenças sus mantuns tèmas, micologia, meteorologia e auts en occitan e en francés.

E tà acabar e tau plaser, la canta deu dia.

Topin de la Tor Montrejau

Sauvatèrra lo 26 de heurèr 2023

Topin la Condelèra

Aus Antins lo 5 de heurèr 2023

Dinc adara los Topins que's debanavan mei que mei per dehòra. En efèit passejadas, visitas que son reservadas aus dias de primtemps o d'abòr.

Que calèva trobar auta causa tà ns'amassar pendent aquera tempsada de hred e (normaument) tròp sovent de ploja. N'estó pas briga complicat en ligar duas de las causas mei estimadas deu monde de noste : la paraula e lo gormandèr... La paraula dab los condes, las hèitas e los jòcs tà har participar los aprenents e los qui ne son pas tròp adaise dab la lenga. Tau gormandèr n'estó pas tròp complicat tanpauc. En aquera tempsada de candelèra : perqué pas quauquas crespèras en mei deu disnar tirat de la saca ? Atau qu'èra vaduda la Condelèra !

E se n'èram pas hòrt numerós aqueste còp, - hèra de desencusats pr'amor de cuentas o de virus - qu'estom totun ua dotzena qui passèm ua pausa hòrt agradiva qui comencè de cap à 10 òras e mieja aqueth dimenge 5 de heurèr. En mei deus condes e autas hèitas que i estón tanben cantas, quauques pas de dança qui'ns mièn dinc a 5 òras deu ser. Que ns'i tornaram !

E un gran mercés a l'animator deu dia, lo Cristau de Hauguernes e a la nosta ostessa, la Ania qui'ns permetó d'estar arcuelhuts a l'Amicala deus Antins on ns'esperava un huèc bambau.