Lo Topin de Lenga

Lo Topin, qu'ei aquò ? Lo topin, qu'ei tot simplament lo plat hens lo quau e hèm còser aquèra preparacion mitica bearnesa, la garbura.

Fin finau, las garburas pr'amor que i a autant de garburas com de cosinèrs...

En efèit cadun que i pòrta la soa tòca personau en tot hicar un drin de si medish entà la preparar tau mei gran nombre.

Tà har un Topin de Lenga, que i a un hèish de recètas diferentas :  Los ingredients que son miats per l'organizator deu dia qui hè descobrir la soa coneishença e la soa vision deu territòri, las soas passions, lo son mestièr etc. Que pòt estar ua visita, ua batalèra, ua conferéncia etc...

En fèit qu'ei un moment en occitan, prepausat cada mes suu territòri de Bearn deus Gaves e de drin mei luenh.

Lo Topin que comença au matin. Que's persegueish per un disnar a la pòrta-te-n'i, moment conviviau e privilegiat entà parlar, escotar, escambiar, ua cantèra e que s'acaba au vrèspe.

Los qui s'i hèn, «los cosinèrs» que son un collectiu d'associacions e de personas deu territòri : Los Chancaires, l'ASEC, Cultura de Noste, Los Amics deu Vielh Salias e personas mei...

Qu'ei ua estructura ubèrta : que s'i pòt har tanben tota persona o associacion qui desiraré perpausar un tau moment.

Lo Topin que s'adreça autant aus aprenents com aus locutors confirmats o aus qui an tot simplament enveja de descobrir la lenga. E entaus neofits, l'ajuda d'un liberet bilingüe presentant l'activitat deu dia ligat a la proximitat lingüistica deu gascon e deu francés que'us permet de non pas se retrobar perduts !

Lo son objectiu qu'ei simple : perméter a tots los amorós o curiós de la lenga nosta de viéner escotar, parlar en hant (tornar) descobrir lo territòri e los sons actors.

Tà har brac qu'ei un maine de dia immersiu mesadèr en lenga autorn d'ua tempsada tostemps de tria e mei que mei conviviau.